இந்திய சினிமாவின் பிரம்மாண்ட இயக்குநர் எஸ்.எஸ். ராஜமௌலி ஒரு படத்தை பாராட்டுகிறார் என்றால், அதில் ஏதோ ஒரு மேஜிக் ஒளிந்திருக்கிறது என்றுதான் அர்த்தம். பிரியங்கா சோப்ரா நடிப்பில் உருவாகியுள்ள ஹாலிவுட் படமான ‘த பிளஃப்’ (The Bluff) இப்போது அந்தப் பெருமையைப் பெற்றுள்ளது.ஹாலிவுட் திரையுலகில் தனக்கென ஒரு இடத்தை பிடித்துள்ள பிரியங்கா சோப்ரா, தற்போது ‘த பிளஃப்’ திரைப்படத்தில் ஒரு கடற்கொள்ளையராக நடித்திருக்கிறார். 19-ஆம் நூற்றாண்டின் கரீபியன் தீவுகளைப் பின்னணியாகக் கொண்ட இந்தப் படத்தின் பிரத்யேகக் காட்சியைப் பார்த்த இயக்குநர் ராஜமௌலி, தனது சமூக வலைதளப் பக்கத்தில் படக்குழுவினரை வெகுவாகப் பாராட்டியுள்ளார்.
முக்கியமாக, பிரியங்கா சோப்ராவின் நடிப்பை “வெறித்தனமான வலிமை” (Ferociously strong) என்று அவர் குறிப்பிட்டிருப்பதுதான் இப்போது பேசுபொருளாகியுள்ளது. ஒரு கடற்கொள்ளையராக பிரியங்கா காட்டியிருக்கும் உடல்மொழி மற்றும் ஆக்ஷன் காட்சிகள் ராஜமௌலியை வெகுவாகக் கவர்ந்துள்ளன. படத்தின் வேகம் மற்றும் அந்த அந்த காலக்கட்டத்தை கண்முன் நிறுத்திய விதம் என ஒவ்வொன்றையும் அவர் தனித்தனியாகக் குறிப்பிட்டுப் பாராட்டியுள்ளார்.இயக்குநர் ஃபிராங்க் இ. பிளவர்ஸ் இயக்கியுள்ள இந்தப் படத்தில், தனது குடும்பத்தைப் பாதுகாக்கப் போராடும் முன்னாள் கடற்கொள்ளையராக பிரியங்கா நடித்துள்ளார். இந்தியாவிலிருந்து ஹாலிவுட் சென்ற ஒரு நடிகை, இத்தனை வலிமையான கதாபாத்திரத்தை ஏற்று நடித்திருப்பதை ராஜமௌலி போன்ற ஒரு இயக்குநர் அங்கீகரிப்பது சர்வதேச அளவில் அந்தப் படத்திற்குப் பெரிய வெளிச்சத்தைக் கொடுத்துள்ளது.
இந்தத் திரைப்படத்தில் நடிகர் காரல் அர்பன் (Karl Urban) ஒரு முக்கிய கதாபாத்திரத்தில் நடித்துள்ளார். ராஜமௌலியின் இந்தப் பாராட்டு மழையைத் தொடர்ந்து, பிரியங்கா சோப்ரா அவருக்கு தனது நன்றியைத் தெரிவித்துள்ளார். ‘ஆர்ஆர்ஆர்’ படத்தின் உலகளாவிய வெற்றிக்குப் பிறகு ராஜமௌலியின் கருத்துக்கள் சர்வதேச சினிமா வட்டாரத்தில் உன்னிப்பாகக் கவனிக்கப்படுவது குறிப்பிடத்தக்கது.சினிமா மொழியில் ஒரு நேர்த்தியான ஆக்ஷன் டிராமாவாக உருவாகியுள்ள ‘த பிளஃப்’, அமேசான் பிரைம் வீடியோவில் வெளியாக உள்ளது. தொழில்நுட்ப ரீதியாகவும், கதை ரீதியாகவும் இந்தப் படம் ஒரு புதிய அனுபவத்தைத் தரும் என ராஜமௌலி தனது பதிவில் நம்பிக்கை தெரிவித்துள்ளார்.ஒரு பிரம்மாண்ட இயக்குநரின் பாராட்டு, ‘த பிளஃப்’ படத்தின் மீதான எதிர்பார்ப்பை பல மடங்கு உயர்த்தியுள்ளது.