ஓடிடி யுகத்தில் மக்களின் பொறுமை குறைந்து வருவதாக ஒரு பேச்சு உண்டு. ஆனால், திரையுலகின் தற்போதைய போக்கோ இதற்கு நேர்மாறாக இருக்கிறது. பிரம்மாண்டப் படங்கள் இப்போது கால அளவு என்ற எல்லையைத் தாண்டிப் பயணிப்பது, சினிமா விநியோகச் சங்கிலியில் புதிய விவாதங்களைக் கிளப்பியுள்ளது.
யஷ் நடிப்பில் உருவாகி வரும் ‘டாக்ஸிக்’ (Toxic) மற்றும் பாலிவுட்டின் ‘துரந்தர் 2’ (Dhurandhar 2) ஆகிய படங்கள் தலா மூன்று மணி நேரத்திற்கும் மேலான ஓட்ட நேரத்தைக் (Runtime) கொண்டிருப்பதாகத் தகவல்கள் வெளியாகியுள்ளன. ஒரு படத்தின் நீளம் என்பது வெறும் படைப்புச் சுதந்திரம் சார்ந்தது மட்டுமல்ல, அது அந்தத் திரைப்படத்தின் வணிகத்தையும் நேரடியாகப் பாதிக்கக்கூடியது என்பதுதான் தற்போதைய கவலை.
வழக்கமாக ஒரு படம் 2 மணி நேரம் 30 நிமிடங்கள் இருந்தால், ஒரு நாளைக்கு ஒரு திரையரங்கில் 5 காட்சிகள் வரை திரையிட முடியும். ஆனால், ‘டாக்ஸிக்’ போன்ற படங்கள் 3 மணி நேரத்தைத் தாண்டும்போது, ஒரு காட்சியைக் குறைக்க வேண்டிய கட்டாயம் தியேட்டர் உரிமையாளர்களுக்கு ஏற்படுகிறது. இது ஒட்டுமொத்த வசூலில் ஒரு பெரிய ஓட்டையை ஏற்படுத்தும் என விநியோகஸ்தர்கள் அச்சப்படுகின்றனர்.படைப்பாற்றல் ரீதியாகப் பார்த்தால், கதையின் ஆழத்திற்காக இத்தனை நீளமான காட்சிகள் தேவைப்படலாம். ஆனால், இடைவேளை மற்றும் விளம்பர நேரங்களையும் சேர்த்தால், ஒரு ரசிகர் தியேட்டருக்குள் நான்கரை மணி நேரம் செலவிட வேண்டியிருக்கும். இது குடும்பத்தோடு வரும் ரசிகர்களுக்குச் சற்றுச் சவாலான விஷயமாகப் பார்க்கப்படுகிறது. ஹாலிவுட்டில் கூட சமீபகாலமாக ‘ஓப்பன்ஹெய்மர்’ போன்ற படங்கள் நீண்ட நேரத்தைக் கொண்டிருந்தாலும், இந்திய சூழலில் இது திரையிடல் மேலாண்மையில் (Screening Management) பெரும் சிக்கல்களை உருவாக்குகிறது.
குறிப்பாக, மல்டிபிளக்ஸ் திரையரங்குகளில் காட்சிகளைத் திட்டமிடுவதில் இது கடும் நெருக்கடியைத் தரும். ‘டாக்ஸிக்’ படத்தின் இயக்குநர் கீது மோகன்தாஸ், படத்தின் தீவிரமான கதைக்களத்திற்காக இந்த நீளம் அவசியம் எனக் கருதுவதாகத் தெரிகிறது. அதேபோல் ‘துரந்தர் 2’ படமும் பல கிளைக் கதைகளைக் கொண்டிருப்பதால் அதன் நீளம் அதிகரித்துள்ளது.எடிட்டிங் மேசையில் சில நிமிடங்களைக் குறைத்து வணிக ரீதியான சமரசங்களைச் செய்ய வேண்டுமா அல்லது படைப்பின் ஆன்மாவை அப்படியே தக்கவைக்க வேண்டுமா என்கிற தர்மசங்கடத்தில் படக்குழுவினர் இருப்பதாகத் தெரிகிறது. ‘அனிமல்’ போன்ற படங்கள் நீளமான ஓட்ட நேரத்தைக் கொண்டிருந்தாலும் வசூலில் சாதனை படைத்தன என்பது ஒரு நேர்மறையான முன்னுதாரணம்.இருப்பினும், இந்த ‘3 மணி நேர கிளப்’ படங்கள் தியேட்டர் வருவாயைப் பாதிக்குமா அல்லது ரசிகர்களைத் தக்கவைக்குமா என்பது ரிலீஸின் போதுதான் தெரியும்.