வெள்ளித்திரை அனுபவத்திற்குப் பிறகு, விஜய் சேதுபதி மற்றும் அரவிந்த் சாமி நடிப்பில் உருவான அந்த மௌன மொழி விந்தை இப்போது உங்கள் மொபைல் திரைக்கும் வந்துவிட்டது. ஆனால், இதைப் பார்ப்பதற்கு ஒரு சிறிய நிபந்தனை காத்திருக்கிறது.காத்திருந்த ரசிகர்களுக்கு வந்த திடீர் அப்டேட் நீண்ட நாட்களாக ஓடிடி ரிலீஸுக்காகக் காத்திருந்த ‘காந்தி டாக்ஸ்’ (Gandhi Talks) திரைப்படம் இன்று முதல் அமேசான் பிரைம் வீடியோவில் ஸ்ட்ரீமிங் ஆகத் தொடங்கியுள்ளது.
வசனங்களே இல்லாத ஒரு மௌனத் திரைப்படம் இன்றைய டிஜிட்டல் யுகத்தில் சாத்தியமா என்கிற கேள்விக்கு விடையாக அமைந்த படம் இது. கிஷோர் பாண்டுரங் பெலேகர் இயக்கத்தில் விஜய் சேதுபதி, அரவிந்த் சாமி, அதிதி ராவ் ஹைதரி மற்றும் சித்தார்த் ஜாதவ் நடித்த ‘காந்தி டாக்ஸ்’ கடந்த ஜனவரி 30-ம் தேதி திரையரங்குகளில் வெளியானது. விமர்சன ரீதியாகப் பாராட்டுக்களைப் பெற்றாலும், பல ஊர்களில் இந்தப் படத்தை தியேட்டரில் பார்க்க முடியாத சூழல் ரசிகர்களுக்கு இருந்தது.
இந்நிலையில், இன்று பிப்ரவரி 27-ம் தேதி இந்தப் படம் அமேசான் பிரைம் வீடியோ தளத்தில் அமைதியாகத் தடம் பதித்துள்ளது. ஆனால் இங்கேதான் ஒரு விஷயம் இருக்கிறது. இந்தப் படம் தற்போது ‘ரெண்டல்’ (Rental) முறையில் மட்டுமே கிடைக்கிறது. அதாவது, ஏற்கனவே பிரைம் சந்தா வைத்திருப்பவர்களும் கூட, குறிப்பிட்ட தொகையைச் செலுத்தி வாடகைக்கு எடுத்தே இதைப் பார்க்க முடியும்.
பொதுவாக ஒரு திரைப்படம் வெளியாகி சில வாரங்கள் கழித்தே இலவச ஸ்ட்ரீமிங்கிற்கு வரும் என்பதால், இன்னும் ஓரிரு வாரங்களில் சந்தாதாரர்கள் அனைவருக்கும் இது இலவசமாகக் கிடைக்க வாய்ப்புள்ளது. மௌனத் திரைப்படம் என்பதால் இதில் மொழி ஒரு தடையல்ல. ஏ.ஆர். ரஹ்மானின் பின்னணி இசைதான் இப்படத்தின் ஆணிவேர். வசனங்கள் இல்லாமலேயே ஒரு கதையை எப்படி நகர்த்த முடியும் என்பதற்கு ரஹ்மானின் இசை ஒரு மிகப்பெரிய உதாரணம்.
மும்பையை மையமாகக் கொண்ட ஒரு வேலையில்லாத இளைஞன் (விஜய் சேதுபதி), ஒரு பெரும் தொழிலதிபர் (அரவிந்த் சாமி) மற்றும் ஒரு திருடன் ஆகியோரின் வாழ்க்கை ஒரு புள்ளியில் சந்திப்பதே படத்தின் கரு. பணத்தின் மீதான பேராசை மற்றும் தார்மீகப் போராட்டத்தைச் சொல்லும் இந்தப் படத்தில், நடிகர்களின் முகபாவனைகளும் உடல்மொழியும் மட்டுமே பேசுகின்றன.தற்போது பிரைம் வீடியோவில் வாடகைக்குக் கிடைத்தாலும், படத்தின் அதிகாரப்பூர்வ ஓடிடி உரிமத்தை ஜீ5 (ZEE5) நிறுவனம் கைப்பற்றியுள்ளதாகத் தகவல்கள் தெரிவிக்கின்றன. எனவே, கூடிய விரைவில் ஜீ5 தளத்திலும் இந்தப் படம் வெளியாகக்கூடும்.
விஜய் சேதுபதியின் மாறுபட்ட நடிப்பையும், அரவிந்த் சாமியின் முதிர்ச்சியான பங்களிப்பையும் ரசிக்க விரும்புவோருக்கு இந்த மௌனப் புரட்சி ஒரு நல்ல தேர்வாக இருக்கும்.சத்தமில்லாமல் வந்துள்ள இந்த மௌனத் திரைப்படம், ஓடிடி தளத்தில் எந்தளவுக்கு அதிர்வலைகளை ஏற்படுத்தும் என்பதைப் பொறுத்திருந்து பார்ப்போம்.